«MIANTSO HO AMIN’NY FIBEBAHANA NY TOMPO»
ALAHADY NANDRAISANA NY FANASAN’NY TOMPO
“Koa mibebaha hianareo dia ho velona“. Ezekiela 18 : 32b
Alahady voalohany amin’ny volana marsa ibanjinana lohahevitra fitaizam-panahy vaovao eto amin’ny sehatry ny FJKM, dia ny hoe : « MIANTSO HO AMIN’NY FIBEBAHANA NY TOMPO ». Alahady fahavalo manaraka ny Epifania.
Ny Mpitandrina Rakotomanana Tahiry no nitarika ny fotoana sy nitondra ny hafatry ny Tompo.
Ny Litorjia amin’ny endriny voalohany no nentina nanatontosana ny fanompoam-pivavahana.
Ny Fanekem-pinoana laharana voalohany no niarahan’ny Fiangonana nanonona, nanehoany ny finoany an’i Jesoa Kristy.
Ny Perikopa voalahatra dia ny Ohabolana 1:20-33 ; Matio 3: 7-12 ; Asan’ny Apostoly 26 : 19-23.
Ireo Diakona tompon’anjara: Andrianifahanana Hantarisoa no nanao ny vavaka mialoha ny vakiteny. Rakotonarivo Tsiry no namaky manontolo ireo perikopa voalahatra.
Ny Antoko Mpihira Hasin’ny Famonjena no nanao anjara hira taorian’ny Toriteny.
Ireo teraka ny volana febroary no nanao rakitra tsingerinandro naterina ety amin’ny alitara.
Ramanandraibe Haingo no nanatanteraka ny fotoana ho an’ny ankizy sy ny tanora.
Ny andinin-tSoratra Masina Ezekiela 18 : 32b : « Koa mibebaha hianareo dia ho velona » no nanatsoahany ny hafatra ho azy ireo.
« Koa mamoaza voa miendrika ny fibebahana ianareo » Matio 3 : 8
1-Inona marina ny atao hoe Fibebahana ao amin’ny Tompo?« ka nataony batisa tao amin’ny ony Jordana ireny, rehefa niaiky ny fahotany » Matio 3 : 6
Batisa :
- Diovina ny fahotan’ny nofo
- Fikisahana mandray ny Fanahy Masina.
- Fialana amin’ny faharatsiana ka fanadiovana ny fahotana
- Tsy fiverenana amin’izany intsony
- Fandraisana ny Fanahy Masina ka hidirana amin’ny fiainan’ny Finoana
« Tandremo mandeha mafy loatra ka diso lalana » hoy ny Filoha FJKM Irako Andriamahazosoa Ammi.
2-Inona ny hevitra diso na lalana diso mandrakariva iainan’ny olona ?
- Fandosirana ny fahatezeran’Andriamanitra :
« Ary Jerosalema sy Jodia rehetra mbamin’ny tany rehetra amoron’i Jordana dia nivoaka nankany amin’i Jaona, ka nataony batisa tao amin’ny ony Jordana ireny, rehefa niaiky ny fahotany. Fa nony nahita ny Fariseo sy ny Sadoseo maro nanatona ny batisany izy, dia hoy izy taminy: Ry taranaky ny menarana, iza no nanoro hevitra anareo handositra ny fahatezerana ho avy? » Matio 3 : 5 – 7
« Ary Jesoa namaly ka nanao hoe: Ry taranaka tsy mino sady efa nivadika, mandra-pahoviana no hitoerako aminareo? Mandra-pahoviana no handeferako aminareo? Ento aty Amiko izy. » Matio 17 : 17 - Tsara ary ilaina ny anaran’ny Ray, Abrahama, ny razambe, ny taranaka fa miampy mila mino sy mibebaka tokoa, mandray an’i Jesoa Kristy ary miala amin’ny ratsy fanao.
« Koa mamoaza voa miendrika ny fibebahana ianareo; ary aza manao anakampo hoe: Manana an’i Abrahama ho rainay izahay; fa lazaiko aminareo fa Andriamanitra mahay manangana zanaka ho an’i Abrahama avy amin’ireto vato ireto. » Matio 3 : 8 – 9
♫ Feo ♪
Nitendry orga : Harentsoa Rova
Nikirakira fafana : Andrinavalona
Nikirakira fanamafisam-peo : Jonathan Rabemananoro
Naka sary : Ramahery Hasina
Nandray an-tsoratra : Raoliarizaka Bakoly
