« MIORINA AMIN’NY FINOANA NY MPINO »
ALAHADY FAHA XVIII MANARAKA NY TRINITE
« …Mamaka tsara sy miorina mafy ao aminy ary tafatoetra amin’ny finoana , toy ny efa nampianarana anareo ka mazoto amin’ny fisaorana. » Kolosiana 2:7
Alahady farany ibanjinana ny lohahevitra « Miorina amin’ny finoana ny Mpino ». Alahady isaorana an’Andriamanitra noho ny fahafahana miombom-bavaka indray sady anatanterahin’ny Sampana Fifohazana asa fampaherezana.
Ny Mpitandrina Rakotomanana Tahiry no nitarika ny fotoana sy nitory ny Tenin’Andriamanitra.
Ny Litorjia endriny faharoa no nentina nanatanteraka ny fanompoam-pivavahana.
FOTOANA HO AN’NY ANKIZY SY TANORA
Randriambololona Vola mpampianatra Sekoly Alahady no nanatanteraka ny fotoana.
Ny Lioka 17 :6 manao hoe «Ary hoy ny Tompo : Raha manana finoana na dia hoatra ny voan-tsinampy iray aza hianareo, dia azonareo lazaina amin’io voroihazo io hoe : Miongota, ary aoka hambolena ao anatin’ny ranomasina, dia hanaiky anareo izy » no nakana ny fampianarana.
Ny tantaran’i Marta no nentina ho an’ny ankizy sy tanora. Inty zazavavy inty dia tsy nanaraka ny tenin’ny reniny izay nanoro azy ny lalana tokony hizorany rehefa avy mianatra, ka nandeha tany amin’ny lalankely feno ankizilahy tia setrasetra. Vokany, naratra i Marta ka niditra hopitaly ary tsy nahateny intsony satria simba ny «corde vocale». Nisy mpanompon’Andriamanitra anefa nivarotra boky masina tao an-tranon’izy ireo ary nitondra am-bavaka azy. Nanam-pinoana izy ireo ka nahavoaka feo ihany i Marta. Anankiroa ny anatra azo raisina amin’izany tantara kely izany dia ny tokony hankatoavana ny tenin-dray aman-dreny, ary ny hoe : afaka mamonjy antsika amin’ny zava-tsarotra rehetra ny finoana.
FANKALAZANA NY TENIN’ANDRIAMANITRA
Ny Perikopa voalahatra :
Genesisy 35 : 9 – 15 ; Matio 15 : 21 – 28 ; Jakoba 1 : 1 – 4
TORITENY
Ny torolalana telo omen’Andriamanitra antsika raha te ho voavonjy isika no niompanan’ny toriteny.
1) Matio 15 : 21-22 Mitadiava an’i Jesoa ka mangataha aminy fa hamonjy anao Izy.
2) Matio 15 : 23-27 Reseo ireo sakana rehetra atrehinao rehefa hanatona na hifamatotra Aminy ianao.
3) Matio 15: 28 Minoa fa Jesoa mahay ny zavatra rehetra.
IREO TOMPON’ANJARA
Nitendry orga : Randriambeloson Sitraka
Nikirakira ny fafana : Raharijaona Nantenaina
Nikirakira ny fanamafisam-peo : Ramahery Yves
Naka sary : Ramahery Hasina
Nandray an-tsoratra : Zanaharitsimba Toky
